Pogradec – Inaugurimi i rrugës Qukës–Qafë Plloçë shënon një kthesë historike për krahinën e Mokrës, duke i dhënë fund izolimit të gjatë dhe duke e lidhur më fort me qarkun e Korçës dhe gjithë vendin. Kryebashkiaku i Pogradecit, Ilir Xhakolli, e cilësoi këtë investim si një “arterie të re” që hap rrugën për zhvillim, turizëm dhe më shumë gjallëri në zonë.
“Sot u bë një hap i madh për zhvillimin e krahinës së Mokrës dhe gjithë juglindjes. Inagurimi i rrugës Qukës-Qafë Plloçë nga Kryeministri Edi Rama dhe Ministrja Belinda Balluku. Kjo rrugë e cila është një vepër strategjike dhe që sjell më afër Tiranën me juglindjen, shkurton ndjeshëm distancën dhe kohën e udhëtimit. Ky investim i shumëpritur hap një mundësi të re për zhvillimin ekonomik, turizmin dhe lëvizjen e banorëve të Mokrës e më gjerë. Një rrugë që lidh njerëzit, rrit shpresën dhe sjell më shumë gjallëri në zonën tonë.” u shpreh Xhakolli gjatë ceremonisë së inagurimit.
Për dekada, Mokra ka vuajtur nga izolimi dhe infrastruktura e amortizuar që kufizonte mundësitë e zhvillimit. Sot, me përfundimin e kësaj rruge, hapet një kapitull i ri që pritet të nxjerrë në pah potencialin e turizmit malor, bujqësisë dhe iniciativave të reja ekonomike.
Rruga e re pritet të shkurtojë ndjeshëm distancën drejt Tiranës dhe të gjenerojë impakt pozitiv jo vetëm për Mokrën, por për gjithë juglindjen.
