Nga Gentian Çala/ No more democracy!
(Demokraci nuk ka më!)
Për këdo që besonte ende në demokracinë apo thuajse demokracinë e republikës sonë, tashmë është e qartë se ajo nuk ekziston.
Seanca e sotme parlamentare zgjati shkurt, me përplasje, pas provokimit kryeministror dhe reagimit të drejtë të opozitës.
Regjimi nuk ngurroi të tregonte muskujt, nervozizmin dhe forcën e kartonëve. Regjimi nuk duron më asgjë kundër. Seanca mbaroi, teatri u mbyll dhe gjithë trupa diplomatike besoj se mbeti e shangur nga ajo që kundronte nga lozhat e sallës së kuvendit.
Asgjë e programuar për seancë normale nuk ndodhi. As fasadë nuk ka më regjimi, sepse mendon se nuk i duhet.
Arroganca nuk pyet as për kushtetutë, as për rregullore dhe as për ligje. Ata e dinë që shtetin e kanë kapur nga maja e piramidës.
Kërcënimet për radhën e supës për arkitektët, kërcënimet për gjyqtarët, kërcënimet për prishje dhe shpronësime tregojnë se regjimi do të shprehet me të gjithë arsenalin e tij të improvizimit, të arbitraritetit, të shpërfilljes ndaj normave dhe rregullave.
Demokraci nuk ka më, gjithçka po funksionon si “one man show”.
Besoj se plaga e regjimit ka filluar të majiset deri në atë pikë sa po prek të gjithë organizimin, jetën e vendit. Regjimi nuk pyet për ju, do të vazhdojë të na shkelë deri në momentin kur ngrihemi dhe reagojmë.
Më mirë një fund me dhimbje sesa një dhimbje pa fund!
