Në kuadër të edicionit të 15-të të Festivalit Ballkanik të Filmit dhe Kulinarisë, publiku do të ketë mundësinë të ndjekë premierën e dokumentarit “Rikthimi i Zonjave”, me autor Armand Braho. Ky dokumentar sjell një rrëfim të ndjerë mbi jetën dhe vuajtjet e grave shqiptare gjatë periudhës së diktaturës komuniste. Përmes dëshmive dhe kujtimeve, filmi ngre lart forcën dhe dinjitetin e tyre, duke e shndërruar në një homazh për sakrificat që nuk duhen harruar.
Shfaqja do të mbahet më 19 shtator 2025, ora 18:00, në natën e katërt të festivalit në qytetin e Pogradecit. Autori i dokumentarit, Armand Braho, në ftesën e tij drejtuar publikut, e cilëson këtë vepër si një moment reflektimi, arti dhe kujtese për historinë:
“Ky dokumentar është një rrëfim i dhimbshëm e i vërtetë mbi jetën, vuajtjet dhe sakrificat e grave në periudhën e diktaturës. Është një homazh për forcën dhe dinjitetin e tyre, por edhe një kujtesë për historinë që nuk duhet harruar.”
Festivali Ballkanik i Filmit dhe Kulinarisë, tashmë një traditë e konsoliduar kulturore në Pogradec, mbledh çdo vit artistë, kineastë dhe dashamirës të artit e kulinarisë nga e gjithë rajoni, duke e kthyer qytetin në një qendër të veçantë të dialogut kulturor ballkanik.
