Korçë – Masa sigurie për autorin e dyshuar të vrasjes në Maliq
Gjykata e Korçës ka dhënë masat e sigurisë për të arrestuarit në lidhje me ngjarjen e rëndë të ndodhur në fshatin Pirg të Maliqit, ku mbeti i vrarë me thikë 14-vjeçari Erald Xhejo.
Sipas vendimit të trupit gjykues, autori i dyshuar Enedio Guri do të qëndrojë në arrest me burg, masë që u vendos edhe për të atin, Edison Guri, dhe për xhaxhain, të akuzuar për pengim të zbardhjes së së vërtetës. Ndërkohë, një mik i babait të autorit është lënë në arrest shtëpie, ndërsa katër të miturit e tjerë, të përfshirë në konfliktin e asaj dite, do të jenë nën detyrim paraqitjeje, me mbikëqyrje të prindërve.
Burime nga salla gjyqësore thanë se gjatë seancës, 14-vjeçari Enedio Guri foli mes lotësh, duke shprehur pendesë të thellë:
“Nuk kam dashur të bëj vrasje. Ishte grindje e çastit. Jam shumë i penduar. Ngushëllime për familjen.”
Avokati i tij, Ledian Spaho, në një deklaratë për mediat u shpreh:
“Shpreh ngushëllimet për humbjen e familjarëve. Gjykata vendosi që autorit t’i caktohet masa ‘arrest në burg’. Kjo është një pasojë e krijuar nga një konflikt i çastit. Edhe pse i mitur, gjykata e vlerësoi të vlefshëm arrestimin, ashtu si edhe për babain Edison Guri dhe për xhaxhain e tij. Për të miturit e tjerë, gjykata vendosi se arrestimi nuk ishte i ligjshëm, duke urdhëruar mbikëqyrjen nga prindërit dhe paraqitjen e tyre para gjykatës. Autori shprehu pendesë, tha se nuk donte të kishte këtë pasojë dhe se nuk e dinte që veprimet e tij do të çonin deri këtu. Të njëjtën gjë ka deklaruar edhe babai i tij, duke thënë se i vjen keq për pasojën e ndodhur.”
Ngjarja e rëndë vijon të rëndojë opinionin publik në Maliq, ndërsa procesi gjyqësor do të vijojë me hetime të mëtejshme të Prokurorisë së Korçës.
