Vendimi i fundit i qeverisë për fiskalizimin e sektorit të tregtimit të bulmetit ka ngjallur reagime të forta në rrethin e Korçës, ku dhjetëra fermerë dhe blegtorë shprehin pakënaqësinë për një masë që, sipas tyre, nuk është në përputhje me realitetin ekonomik të zonave rurale.
Prej vitesh, një pjesë e madhe e fermerëve të fshatrave përreth Korçës sigurojnë jetesën përmes shitjes së qumështit të freskët dhe produkteve të përpunuara të bulmetit, të cilat i shesin drejtpërdrejt në tregje apo rrugëve të qytetit.
K
Blegtorët thonë se zbresin çdo mëngjes nga fshatrat me biçikleta dhe bidonë qumështi për t’i shitur ato në rrugë, por vendimi i ri i detyron të pajisen me kasa fiskale e të lëshojnë kupon tatimor, një kërkesë që e cilësojnë të papërballueshme dhe të palogjikshme për kushtet në të cilat punojnë.
Ata nënvizojnë se nuk kanë as infrastrukturën, as mjetet teknologjike dhe as njohuritë për të përmbushur kërkesat e reja, ndërsa vendimi, sipas tyre, favorizon bizneset e mëdha të përpunimit të bulmetit dhe jo prodhuesit e vegjël.
Në kushte të zakonshme, blegtorët arrijnë të shesin një bidon me 1.5 litra qumësht për 120 deri në 150 lekë, ndërkohë që baxhot u ofrojnë vetëm 60 lekë për litër një çmim që nuk mbulon as kostot minimale të prodhimit.
Fermerët kërkojnë që autoritetet të rishikojnë vendimin, duke theksuar se zbatimi i tij në mënyrë të menjëhershme rrezikon të shkatërrojë ekonominë familjare të qindra familjeve të zonës, të cilat jetojnë vetëm nga blegtoria.
