Një mbrëmje e mbushur me art, emocione dhe energji pozitive u zhvillua këtë të hënë në Odeonin e qytetit liqenor, ku nxënësit e Qendrës Kulturore “Lasgush Poradeci” sollën për publikun një aktivitet të veçantë artistik.
Të rinjtë dhe fëmijët që ndjekin kurset e ndryshme pranë kësaj qendre kulturore shpalosën punën e tyre disamujore përmes një programi të pasur me këngë dhe kërcim.
Luiza Mara, trajnere e kantos, u shpreh se ishte e emocionuar për këtë aktivitet të veçantë, ndërsa theksoi se qyteti i Pogradecit ka shumë talente të rinj që duhet të zbulohen.
Ndërkohë, koreografja Zhuljeta Kalkollari tha se eventi u prit shumë mirë, dhe se koncerti është fryt i një pune të vazhdueshme me të rinjtë pogradecarë.
Eritan Kamolli, drejtues i Qendrës Kulturore, e vlerësoi aktivitetin si një ndër mënyrat më të mira për të promovuar fëmijët e talentuar, duke theksuar se gjatë këtyre muajve verorë, qyteti do të ketë një kalendar të pasur aktivitetesh për turistët dhe vendasit.
Ndër pjesëmarrësit e këtij aktiviteti ishte edhe Serena Luli, e cila ndau emocionet e saj me publikun.
Përmes kësaj veprimtarie, Qendra Kulturore “Lasgush Poradeci” dëshmoi edhe një herë rëndësinë e edukimit artistik në jetën kulturore të qytetit dhe fuqinë që arti ka për të frymëzuar, bashkuar dhe dhuruar emocione.
