Në ambientet e Universitetit Ndërkombëtar në Strugë, u zhvillua sot prezantimi i “MindSpace” – një hapësirë e re moderne dhe multifunksionale që synon të shërbejë si pikë takimi për ide, bashkëpunim dhe krijimtari studentore. Kjo iniciativë u realizua me mbështetjen e Programit Erasmus+, i cili vazhdon të promovojë ndërveprimin kulturor dhe zhvillimin personal e akademik të të rinjve në të gjithë Evropën.
Në postimin zyrtar të universitetit thuhet:
“Sot, në ambientet e Universitetit Ndërkombëtar në Strugë, me mbështetje të Programit Erasmus +, para studentëve u prezantua një hapësirë që simbolizon kreativitetin, inovacionin dhe bashkëpunimin ndërkulturor – MindSpace.
Programi Erasmus, që ka për qëllim të bashkojë të rinjtë nga e gjithë Evropa, mbështet çdo hapësirë universitare që do të shërbejë jo vetëm si një hapësirë fizike por si kënd studentor ku idetë marrin jetë dhe diversiteti është pasuri.
MindSpace do të pasurojë përvojën akademike të çdo studenti duke nxitur kreativitetin e tyre, duke qenë i dedikuar për aktivitetet studentore, organizimin e punëtorive dhe trajnimeve.
“MindSpace – When learning becomes an adventure!”
Kjo hapësirë nuk është vetëm një investim në infrastrukturë, por një hap i rëndësishëm drejt ndërtimit të një kulture akademike që inkurajon mendimin kritik, inovacionin dhe dialogun mes kulturave. “MindSpace” do të shërbejë si një qendër ku studentët do të kenë mundësinë të zhvillojnë projektet e tyre, të marrin pjesë në trajnime, punëtori dhe aktivitete që lidhen me zhvillimin personal dhe profesional.
Kjo nismë është në përputhje të plotë me misionin e Programit Erasmus+, i cili promovon lëvizshmërinë, përfshirjen dhe bashkëpunimin në arsim, duke kthyer universitetet në qendra të gjalla të dijes dhe kulturës evropiane.
“MindSpace” në Universitetin Ndërkombëtar të Strugës është një dëshmi konkrete se si një vizion i qartë dhe një partneritet i qëndrueshëm me programet evropiane mund të sjellë ndryshim real në jetën studentore.
