Shkolla “Kajo Karafili” në Gështenjas drejt transformimit të plotë: nis rikonstruksioni i përgjithshëm
Pogradec, prill 2025 – Ka nisur procesi i rikonstruksionit total të shkollës 9-vjeçare “Kajo Karafili” në fshatin Gështenjas, një investim i përbashkët mes Bashkisë Pogradec dhe Ministrisë së Arsimit dhe Sporteve. Projekti synon përmirësimin e infrastrukturës shkollore dhe krijimin e kushteve të përshtatshme për zhvillimin e procesit mësimor.
Sipas njoftimit zyrtar të Bashkisë, “me punimet që po realizohen për rikosntruksionin total të shkollës ‘Kajo Karafili’ të fshatit Gështenjas: palestër e re sportive, hapësira të reja shtesë, salla aktivitetesh dhe banja të reja, sistem ngrohje me kaldajë, sistem i ri elektrik, rikonstruksion i ambienteve të brendshme dhe të jashtme ekzistuese, bazë e re materiale në fund të punimeve. Ky është një investim që kryhet në bashkëpunim mes Bashkisë Pogradec dhe Ministrisë së Arsimit dhe Sporteve, në fund nxënësit e Gështenjasit do të kenë ambiente të reja dhe me standarde bashkëkohore.”
Punimet përfshijnë ndërtimin e një palestre moderne sportive dhe krijimin e hapësirave të reja për zhvillimin e aktiviteteve edukative dhe komunitare. Po ashtu, objekti shkollor do të pajiset me banja të reja dhe një sistem ngrohjeje me kaldajë për të garantuar komoditet gjatë stinëve të ftohta.
Një ndër komponentët kryesorë të ndërhyrjes është edhe sistemi i ri elektrik, i cili po zëvendëson tërësisht instalimet ekzistuese me teknologji më të avancuar dhe të sigurt. Ambientet e brendshme dhe të jashtme të shkollës po rikonstruktohen në tërësi, për të përmbushur standardet e nevojshme infrastrukturore dhe estetike.
Në përfundim të projektit, shkolla do të disponojë edhe një bazë të re materiale, duke përmirësuar ndjeshëm cilësinë e procesit mësimor dhe mbështetës për nxënësit. Ky investim është pjesë e angazhimit të pushtetit vendor dhe qendror për përmirësimin e kushteve në institucionet arsimore të zonave rurale dhe sigurimin e një arsimi cilësor për të gjithë.
