Bashkia Pogradec përcakton vendet për afishimin e materialeve propagandistike gjatë fushatës zgjedhore
Pogradec, 2 prill 2025 – Bashkia e Pogradecit ka miratuar një vendim që përcakton rregullat dhe vendet e lejuara për afishimin e materialeve propagandistike gjatë fushatës zgjedhore, në përputhje me ligjin nr. 139/2015 “Për vetëqeverisjen vendore”, si dhe me Kodin Zgjedhor të Republikës së Shqipërisë.
Në këtë vendim parashikohet që subjektet zgjedhore të afishojnë materialet propagandistike në një distancë prej të paktën 5 metrash nga zyrat e tyre zgjedhore apo subjektet zgjedhore, duke filluar jo më herët se 35 ditë para datës së zgjedhjeve. Vendimi ndalon shprehimisht afishimin në fasadat e godinave të banimit, institucionet publike, hapësirat përreth tyre, në zonat rekreative, parqe dhe pemë të qytetit si dhe në shtyllat e ndriçimit publik.
Gjithashtu, ndalohet vendosja e materialeve propagandistike në mjetet e transportit publik. Vendet e përcaktuara për afishim duhet të garantojnë dukshmëri të plotë për publikun dhe të kenë hapësirë të mjaftueshme që t’u mundësojë të gjitha subjekteve pjesëmarrëse në zgjedhje paraqitjen e mesazheve të tyre.
Subjektet zgjedhore mund të afishojnë materiale vetëm në vendet e autorizuara nga Kryetari i Bashkisë, i cili, sipas vendimit, ka të drejtën të marrë masa për heqjen e materialeve të vendosura në kundërshtim me këto rregulla.
Vendimi përcakton si vend të posaçëm për afishimin e materialeve propagandistike një hapësirë në afërsi të Teatrit të Kukullave, përkatësisht në anën anësore të godinës së ish-Pallatit të Sportit “Arefi Berberi”.
Policia Bashkiake dhe Policia e Shtetit janë ngarkuar me detyrën e zbatimit të këtij vendimi, duke garantuar heqjen e çdo materiali që është vendosur jashtë kritereve të përcaktuara.
Vendimi hyn në fuqi menjëherë dhe do të publikohet në faqen zyrtare të Bashkisë Pogradec menjëherë pas miratimit të tij.
