Shkruan Genti Çela/ A do të kandidosh në Primare?
Kjo ka qenë pyetja të cilën kam hasur më së shumti.
Pas konsultimeve me demokratë, qytetarë e miq të shumtë, tani e kam një përgjigje.
Po, do të jem pjesë e primareve sepse besoj tek fuqia jonë për të ndryshuar.
Njëzet vite më parë, fare i vogël, jam angazhuar në Forumin Rinor të Partisë Demokratike në Pogradec.
Prej asaj kohe, kam kaluar në të gjitha shkallët e strukturës sonë, në seksion, grupseksion, kryesi dhe prej gati tre vitesh kam nderin e jetës të jem kryetar i Partisë Demokratike në Pogradec.
Kemi ndarë së bashku sfidat, përpjekjet, sakrificat deri edhe burgosjet për shkak të asaj që besojmë. Lirisë.
Kam të shenjuar në mendje e zemër mundin e secilit prej demokratëve të Pogradecit në më shumë se një dekadë jo të lehtë.
Kam parë në sytë e secilit vendosmërinë për të mos u dorëzuar, pavarësisht një strukture saktësisht mafioze të korruptuar dhe të veshur me pushtet e pará. Pavarësisht gjithçkaje!
Me secilin prej jush, kam ndier fatin më të madh të jetës, fatin që linda demokrat dhe pjesë e kësaj familjeje të madhe vlerash.
Dua t’u ftoj të bëhemi pjesë e këtij proçesi nga i cili do të dalim më të fortë e më të bashkuar.
Të gatshëm për t’i propozuar Pogradecit, ofertën më të denjë, programin e Partisë Demokratike të Shqipërisë.
Më 1 Mars, le të tregojmë edhe njëherë forcën tonë!
Ju presim!
Me mirënjohjen e përjetshme, Genti! 
