Qarku i Korçës, ditët e fundit, është tronditur nga raste të shumta dhune në familje. Më i rëndi u regjistrua ditën e shtunë në qytetin e Korçës, ku Bledar Trendafili i hodhi benzinë dhe i vuri zjarrin bashkëshortes së tij, Melisa Trendafili. Ndërsa, në më pak se 24 orë, dy raste të tjera u evidentuan nga Komisariati i Maliqit, ku ngjarjet u parandaluan në kohë nga policia për të mos u përshkallëzuar.
Sociologët, për rastet e shtuara të dhunës në juglindje të vendit, rendisin disa arsye që çojnë familjarët të dhunojnë njëri-tjetrin.
Sipas sociologes Maria Doiçe, tranzicioni social që ka barazuar rolin e gruas dhe burrit në familje, si dhe ulja e moshës së konsumuesve të alkoolit dhe lëndëve narkotike, ka bërë që rastet e dhunës të jenë më të evidentuara në qarkun e Korçës.
Ajo, ndërkaq, jep rekomandime për uljen e rasteve të dhunës. Sipas saj, së fundmi, gratë janë sensibilizuar të denoncojnë rastet e dhunës në familje, por sërish mbetet i lartë numri i atyre që nuk raportojnë dhunën në polici.
Sipas të dhënave, qarku i Korçës renditet ndër qarqet me numrin më të lartë të rasteve të dhunës dhe krimit në familje. Kryesisht, ngjarjet e rënda të regjistruara në qarkun juglindor kanë pasur protagonistë pjesëtarë të së njëjtës familje, ku shpesh janë regjistruar edhe fatalitete.
Sipas të dhënave nga Drejtoria Vendore e Policisë në Qarkun Korçë, për periudhen 01.06.2024 deri me 31.08.2024 ne rang qarku sipas nenit 130/a te K.Penal jane evidentuar 46 raste te dhunes ne mardheniet familjare me 46 autore. Ndërsa sipas Ligjit 9669 kane kerkuar per tu pajisur me Urdher Mbrojtjes 68 shtetas.
