HESHTJA QË FLET ME PUNË
Janë personazhe të thjeshtë që nuk flasin e të mburren vend e pavend , por më tepër sesa vetë , për këta flet puna që bëjnë .
Të mbash pastër qytetin e të të njohin të gjithë në Pogradec , kjo u ndodh vetëm pak njerëzve e kjo meritë i takon Juli Oparakut , këtij djali kaq simpatik që e takon përditë në çdo cep të qytetit duke u përkujdesur për një qytet të pastër .
Kur i kërkova që punën e tij ta përcillja në një skicë të shkurtër portretizimi , në fillim hezitoi e kjo tregon se njeriu i thjeshtë nuk ka nevojë për reklamë .
Juli prej kohësh punon në sektorin e shërbimeve komunale pranë Bashkisë Pogradec dhe me punën e tij ka krijuar respektin e kolektivit , por edhe të qytetarëve pogradecarë .
Atë e shikon zakonisht përgjatë bregliqenit me karrocën e tij ku grumbullon dhe heq mbetjet që krijohen nga bisneset e shumta , por edhe në pastrimin e hapësirave të gjelbërta të qytetit .
– Puna më jep kënaqësi , por është edhe mundësi për të jetuar – shprehet Juli dhe vazhdon të lëvizë për më tutje .
Këta janë njerëz të papërtuar e shumë paqësorë në marrëdhëniet me të tjerët .
Juli Oparaku është një djalë mjaft miqësor dhe praktik në përditshmërinë e tij .
Pas pune , ai ka edhe pasionet e tij të të postuarit e të komunikuarit me miqësinë .
Njeri social , dashamirës i sportit , pëlqen njerëzit e famshëm e nuk heziton të bëjë edhe foto me këta personazhe .
Kushdo që e njeh nga afër Juli Oparakun , flet me respekt e me mirënjohje për këtë djalë fjalëpak e punëshumë .
Respekt për këta djem si Juli që nuk sorollaten udhëve papunë , por përpiqen dhe jetojnë me dinjitet , falë edukatës familjare që trashëgojnë dhe e reflektojnë në përditshmërinë e tyre .
Njeriu aq sa është për vete , po aq është edhe për të tjerët , për shoqërinë , për vendin e tij e kjo vlen të thuhet edhe për Juli Oparakun .
Juli e meriten respektin e të gjithëve , të qytetarëve pogradecarë të cilëve u shërben me përkushtim dhe me vetëdije se , vetëm puna ta jep kënaqësinë shpirtërore , por edhe mundësinë materiale për të jetuar me dinjitet .
Djem si Juli e meritojnë respektin .
