Bashkia e Pogradecit duket se ka dështuar të japë shërbimet e duhura në qytetin e Pogradecit dhe në fshatrat e tij. Tashmë është e dëshmuar që edhe kur ka dëshirë për të kryer një investim, nuk di ta bëjë atë investim ashtu siç duhet.
Pas shtrimit të rrjetit të kanalizimeve të ujërave të pijshëm, i cili paraqet një sërë problematikash, në fshatin Blacë të Pogradecit edhe rrugët janë degraduar nga shtrimi i tubacioneve. Ndërsa investimi ka disa kohë që ka përfunduar, askush nuk është kujtuar të rikonstruktojë rrugën e shkatërruar.
Kjo ka sjellë që banorët e zonës të kenë një vështirësi të madhe në përditshmëri, ndërsa paratë për shtrimin e rrugëve të fshatit nuk dihet se nga kanë “fluturuar”. Përpos kësaj situate, shqetësuese është edhe prezenca e ujërave të zeza, të cilat janë në sipërfaqe dhe në shumë zona mungojnë kanalizimet, duke rrezikuar shëndetin e banorëve të zonës.
Historia që investimet janë shpërndarë në të gjitha zonat e Pogradecit është një fabul e cila më nuk besohet nga askush, ndërsa banorët jetojnë çdo ditë në vështirësi të shumta, si pasojë e investimeve të munguara apo të kryera keq.
