Korçari që sfidon tregun e librave/ Florenc Duhanxhiu sjell platformën Libra24.al për autorët shqiptarë
Në një kohë kur libri shpesh mbetet peng i skemave të vjetra të botimit, një i ri nga Korça po tenton të ndryshojë rregullat e lojës. Florenc Duhanxhiu ka ndërtuar platformën digjitale Libra24.al, një hapësirë online që synon t’u japë më shumë kontroll dhe transparencë autorëve shqiptarë mbi veprat e tyre.
Me profesion inxhinier software, Duhanxhiu e nisi këtë projekt si një përgjigje ndaj një realiteti të njohur për shkrimtarët në Shqipëri: mungesë transparence, përfitime të ulëta dhe pamundësi për të ndjekur realisht shitjet e librave. Përmes kësaj platforme, çdo autor mund të ketë një llogari personale, ku ndjek në kohë reale të ardhurat dhe ecurinë e veprës së tij.
Por platforma nuk i drejtohet vetëm autorëve. Ajo synon të lehtësojë edhe aksesin e lexuesve, veçanërisht për shqiptarët që jetojnë jashtë vendit. Përmes Libra24.al, librat mund të blihen online dhe të dërgohen menjëherë në email në format elektronik, duke i bërë të disponueshëm në çdo kohë dhe në çdo pajisje.
Ky model sjell një qasje të re në tregun e botimeve, duke reduktuar ndërmjetësit dhe duke afruar më shumë autorin me lexuesin. Në thelb, platforma synon të rikthejë vlerën ekonomike të autorit dhe të rrisë aksesin ndaj librit shqip, në një epokë ku teknologjia po ndryshon mënyrën se si lexojmë dhe botojmë.
