Pogradeci triumfon në Selanik, dy sportistë shpallen kampionë në Festivalin Ballkanik të Kung-Fu
Pogradeci ka shënuar një tjetër sukses në arenën ndërkombëtare të sportit. Më 1 mars, në Selanik, u zhvillua Festivali Ballkanik i Kung-Fu-së, një aktivitet që mblodhi sportistë nga vende të ndryshme të rajonit në disa disiplina konkurruese.
Në këtë festival, qyteti i Pogradecit u përfaqësua me dy sportistë, Ajla Lushka dhe Klei Ktona. Të dy arritën të renditen në vendin e parë në disiplinat përkatëse, duke u shpallur kampionë dhe duke ngritur flamurin shqiptar në një aktivitet me pjesëmarrje të gjerë ballkanike.
Paraqitja e tyre u vlerësua për nivelin teknik, përgatitjen fizike dhe disiplinën në garë, duke dëshmuar punën e vazhdueshme të sportistëve dhe trajnerëve në këtë sport.
Ky sukses përbën një arritje të rëndësishme për sportin e kung-fu-së në Pogradec dhe një motivim për të rinjtë që ndjekin këtë disiplinë.
