Vijojnë kontrollet intensive të Drejtorisë Vendore të Policisë Korçë për të goditur rastet e prodhimit dhe shitjes së lëndëve narkotike. Aksionet janë zhvilluar në bashkëpunim të ngushtë me Prokurorinë e Rrethit Gjyqësor Korçë, mbi bazën e informacioneve të inteligjencës policore.
Mbrëmjen e djeshme, pas kontrolleve të ushtruara në disa banesa dhe automjete, u shoqëruan rreth 8 persona. Në përfundim të veprimeve hetimore u arrestuan dy prej tyre, të cilët u kapën me një sasi të konsiderueshme lënde narkotike të dyshuar cannabis sativa.
Gjatë kontrolleve u sekuestruan gjithashtu shuma të mëdha parash dhe mjete të përdorura nga të arrestuarit për transportimin e lëndës narkotike.
Policia bën të ditur se puna vijon për identifikimin dhe kapjen e personave të tjerë të përfshirë në këtë aktivitet kriminal, ndërsa kontrollet në terren do të intensifikohen edhe më tej.
