Numri i vizitorëve në Pogradec ka pësuar ulje gjatë këtij viti, duke reflektuar një situatë që ka përfshirë të gjithë vendin. Edhe pse Shqipëria është përmendur shpesh si një destinacion në rritje, të dhënat dhe zërat nga operatorët turistikë tregojnë një realitet tjetër në terren, hotelet dhe bujtinat kanë më pak prenotime, ndërsa bregu i liqenit është më i qetë se vitet e shkuara.
Shkaqet kryesore lidhen me ofertat konkurruese të vendeve të rajonit, ku turistët gjejnë çmime më të ulëta dhe shërbime të standardeve më të larta. Greqia, Mali i Zi dhe Maqedonia e Veriut kanë tërhequr një pjesë të mirë të pushuesve shqiptarë dhe të huaj, duke ofruar paketa të përballueshme dhe kushte më të mira akomodimi.
Një tjetër faktor që ka ndikuar është rënia e fuqisë blerëse të qytetarëve shqiptarë. Ulja e standardit të jetesës ka bërë që shumë familje të kufizojnë shpenzimet për pushime, duke zgjedhur alternativa më të lira ose duke hequr dorë krejtësisht nga udhëtimet turistike. Ky realitet është ndjerë sidomos në zonat e brendshme, ku turizmi nuk ka pasur të njëjtën mbështetje infrastrukturore dhe promovim si bregdeti.
Operatorët turistikë në Pogradec shprehen se situata ka qenë e ndërlikuar edhe për shkak të çmimeve të rritura të shërbimeve bazë, nga akomodimi deri tek restorantet. Kjo e bën qytetin më pak konkurrues, sidomos për vizitorët vendas, të cilët tashmë shohin jashtë kufijve si destinacion më të leverdishëm.
Në vitet e shkuara, gjatë kulmit të sezonit turistik, korriku dhe gushti shënonin periudhën kur ishte pothuajse e pamundur të gjeje një dhomë hoteli apo bujtine të lirë buzë liqenit, pasi çdo kapacitet akomodimi ishte i prenotuar me muaj paraprakisht. Ndërsa këtë verë, situata ka ndryshuar ndjeshëm, shumë struktura pritëse raportojnë dhoma bosh edhe në fundjavë, duke treguar qartë se fluksi i vizitorëve është më i ulët dhe kërkesa nuk i afrohet nivelit të viteve të kaluara.
Megjithatë, ekspertët e fushës theksojnë se kjo situatë mund të përmirësohet me politika më të qarta për mbështetjen e turizmit, rritjen e cilësisë së shërbimeve dhe ofertave më të përshtatura për tregun vendas dhe të huaj. Pogradeci, me potencialin e Liqenit të Ohrit dhe trashëgimisë kulturore, mbetet një destinacion i rëndësishëm, por që kërkon strategji të reja për të rimarrë ritmin e dikurshëm.
