Bashkia Pogradec përkujtoi dje një nga momentet më të rëndësishme të historisë kombëtare, ngritjen e flamurit shqiptar në Gurin e Kamjes më 28 korrik 1912, katër muaj para shpalljes së Pavarësisë së Shqipërisë.
Në këtë ditë me vlera të veçanta historike, u mbajtën homazhe dhe u vendosën kurora me lule, ndërsa fjalimet përkujtimore nderuan figurat dhe ngjarjet që e bënë të mundur këtë akt të madh atdhetarie.
Një vend të veçantë në këtë moment historik zë patrioti Kajo Babjeni dhe çetat patriotike të Gorës e Mokrës, të cilët me guxim dhe përkushtim kontribuan për lirinë e vendit.
Aktiviteti u pasurua me një ekspozitë dokumentare dhe fotografike të përgatitur nga Drejtoria e Turizmit, duke sjellë në vëmendje momente dhe dëshmi të rralla mbi ngjarjet e asaj kohe.
Guri i Kamjes, qëndron sot si një simbol krenarie dhe rezistence, kujtues i përjetshëm i sakrificës për lirinë e Shqipërisë.
