Një humbje e madhe ka prekur komunitetin mjekësor dhe më gjerë, me ndarjen nga jeta të mjekes së njohur anesteziste, Dr. Nertila Kodra Gora, me origjinë nga Starova e Pogradecit.
Doktore e Shkencave Mjekësore dhe specialiste e Anestezisë dhe Reanimacionit, ajo ka shërbyer për plot 27 vite në Qendrën Spitalore Universitare “Nënë Tereza”, në Shërbimin e Kirurgjisë së Përgjithshme. Gjatë gjithë karrierës së saj, ajo është vlerësuar për profesionalizëm të lartë, ndershmëri, urtësi dhe një ndjenjë të thellë humanizmi që e shoqëronte në çdo përballje me dhimbjen dhe shpresën.
Në një postim publik, QSUT ka shprehur ngushëllimet më të sinqerta për humbjen e mjekes që për dekada u bë shtyllë në sistemin shëndetësor shqiptar.
📍Deklarata e plotë e QSUT:
🕊️ QSUT i shpreh ngushëllimet familjes, miqve dhe të afërmve për ndarjen nga jeta të mjekes anesteziste, Doktore e Shkencave Mjekësore, Dr. Nertila Kodra Gora.
Prej 27 vitesh, Dr. Nertila ka shërbyer me përkushtim, ndershmëri dhe humanizëm si mjeke specialiste e Anestezisë dhe Reanimacionit, pranë Shërbimit të Kirurgjisë së Përgjithshme në QSUT. Ajo spikati për profesionalizmin, urtësinë dhe dashurinë e pakushtëzuar për pacientët dhe kolegët.
Në këtë moment të vështirë, stafi i QSUT-së, u shpreh ngushëllimet më të sinqerta vajzave të saj, bashkëshortit, prindërve, miqve dhe kolegëve që ndanë me të jetën dhe profesionin.
🕯️ Pusho në paqe, Nertila. Do të të kujtojmë me respekt e mirënjohje të përjetshme.
⸻
Dr. Nertila Kodra Gora mbetet një emër i nderuar jo vetëm për QSUT-në, por edhe për gjithë komunitetin që ajo përfaqësonte me dinjitet, në profesion dhe në jetë. Kujtimi i saj do të mbetet i paharruar në zemrat e atyre që e njohën dhe bashkëpunuan me të.
