Pogradec – Maturantët përballen me një provim të vështirë në Matematikë
Rreth 650 maturantë në qytetin e Pogradecit iu nënshtruan sot provimit të Matematikës, në kuadër të Maturës Shtetërore 2025. Testimi nisi në orën 10:00 dhe përfundoi në orën 12:30, duke shënuar provimin e tretë zyrtar për këtë sesion.
Sipas dëshmive të para nga vetë maturantët, teza është vlerësuar si e vështirë, me ushtrime që shkonin përtej nivelit mesatar, çka pritet të ndikojë në mënyrë të drejtpërdrejtë në rezultatet përfundimtare. “Nuk ka qenë një tezë e lehtë, shumë prej nesh u përballën me vështirësi në pjesën e ushtrimeve komplekse,” shprehen nxënës të ndryshëm pas përfundimit të testimit.
Masat e sigurisë ishin të shtuara. Çdo maturant iu nënshtrua kontrolleve me detektor metalesh në hyrje të qendrave të provimit, ndërkohë që nuk u lejua mbajtja e celularëve apo pajisjeve inteligjente, në përpjekje për të garantuar standarde të barabarta dhe mbarëvajtje të rregullt të testit.
Provimi i Matematikës vjen pas testimeve në Gjuhën e Huaj dhe Gjuhën Shqipe e Letërsinë, ndërsa raundi përmbyllës do të vijojë me provimet me zgjedhje, në ditët në vijim. Rezultatet e këtij provimi do të jenë vendimtare për ecurinë akademike dhe zgjedhjet universitare të qindra të rinjve pogradecarë.
