Maliqi, gjithnjë e më shumë një pikë referimi për turizmin e aventurës
Zona e Maliqit po kthehet në një nga destinacionet më tërheqëse për turistët që kërkojnë bukuri natyrore, aventura dhe përjetime autentike larg zhurmës së qyteteve të mëdha. Kryetari i Bashkisë, Gëzim Topçiu, ka ndarë një mesazh entuziast përmes një postimi në rrjetet sociale, së bashku me një video, duke theksuar potencialin në rritje të kësaj zone për turizmin e qëndrueshëm.
“Një ditë e zakonshme në Maliq!
Maliqi tashmë është shndërruar në një destinacion kryesor për turistët e aventurës dhe jo vetëm. Natyra e mrekullueshme e Lozhanit, Moglicës dhe zonës së Gores është bërë atraksioni kryesor për vizitorët që kërkojnë bukuri dhe aventura në natyrë.
Eja edhe Ti !”
Lozhani, Moglica dhe zona e Gores ofrojnë një pasuri natyrore të rrallë, me peizazhe mahnitëse, shtigje malore dhe një qetësi që të fton të ndalesh e të reflektosh. Ato janë bërë epiqendra të një forme të re turizmi, që ndërthur bukurinë e natyrës me mikpritjen tradicionale të banorëve vendas.
Bashkia e Maliqit po vijon përpjekjet për promovimin e këtyre vlerave dhe për ndërtimin e infrastrukturës që do ta bëjë zonën edhe më të aksesueshme për vizitorët vendas dhe të huaj.
