Policia e Korçës ka njoftuar nisjen e një procedimi penal ndaj një drejtues automjeti, i përfshirë në një aksident rrugor të ndodhur një ditë më parë në lagjen nr. 4 të qytetit. Si pasojë e përplasjes, një shtetas mbeti i plagosur.
Në njoftimin zyrtar thuhet:
“Në vijim të informacionit paraprak të dhënë dje, për aksidentin rrugor në lagjen nr. 4 Korçë, si pasojë e të cilit u dëmtua shtetasi J. B., informojmë se specialistët e Sektorit të Qarkullimit Rrugor referuan materialet në Prokurori, ku filloi procedimi penal për shtetasin E. B., 36 vjeç, banues në Korçë, për veprën penale ‘Shkelja e rregullave të qarkullimit rrugor’.”
Ngjarja është pjesë e një sërë aksidentesh që kanë ndodhur së fundmi në zonën urbane të Korçës, ku Policia Rrugore ka intensifikuar kontrollet për respektimin e normave të sigurisë në trafik. Autoritetet apeluan edhe njëherë për kujdes të shtuar ndaj përdoruesve të rrugës dhe drejtuesve të mjeteve.
