Ilir Ikonomi flet për Zërin e Amerikës dhe promovon dy vepra studimore në Universitetin e Korçës
Gazetari dhe studiuesi i njohur Ilir Ikonomi ishte i pranishëm në Universitetin “Fan S. Noli” të Korçës, ku zhvilloi një aktivitet promovues për dy nga veprat e tij më të rëndësishme: Fan Noli: Apostulli dhe Fan Noli: Rebeli. Të dy këto libra, të cilat sjellin një portret të plotë, të thelluar dhe historikisht të argumentuar të figurës së Fan Nolit, janë vlerësuar me çmimin e madh “Lumo Skëndo” nga Qendra Kombëtare e Librit dhe Leximit.
Gjatë këtij takimi me studentë, pedagogë dhe dashamirës të librit e historisë, Ikonomi ndau jo vetëm procesin e kërkimit dhe pasionin pas këtyre botimeve, por u ndal edhe në një çështje aktuale që lidhet ngushtë me karrierën e tij disadekadëshe: situatën në Zërin e Amerikës.
Duke komentuar zhvillimet e fundit dhe zërat për mbylljen apo reformimin e këtij institucioni, ai u shpreh:
“Kjo është diçka e trishtueshme për mua, por presidenti Trump ka axhendën e tij. Është i zgjedhur dhe ka një mandat për të bërë ndryshime dhe reforma, dhe ende nuk e dimë se si do të përfundojë kjo çështje. Ai nuk e ka mbyllur Zërin e Amerikës, sepse ekziston një ligj i Kongresit – kjo çështje duhet të kalojë aty nëse ai dëshiron ta mbyllë.”
Ikonomi theksoi se për momentin po ndërmerren reforma të brendshme dhe shkurtime në kuadër të riorganizimit të administratës amerikane, me synimin për të ulur borxhin e jashtëm të Shteteve të Bashkuara, i cili ka arritur shifrën e 36 trilionë dollarëve. Ai shtoi:
“Unë e shoh me trishtim këtë zhvillim, sepse kam qenë për tre dekada në Zërin e Amerikës – si spiker dhe njëkohësisht gazetar, ashtu si ju, duke realizuar intervista dhe raportime. Presidenti Trump është zgjedhur me 80 milionë vota, dhe ka të drejtë të zbatojë programin e tij. Por për mua personalisht, këto ndryshime nuk janë diçka pozitive.”
Takimi në Universitetin e Korçës ishte një mundësi për studentët dhe pjesëmarrësit që të njihen më nga afër me figurën e Fan Nolit – jo vetëm si një prijës shpirtëror dhe përkthyes i shquar, por edhe si politikan i angazhuar dhe njeri me vullnet për reformë. Vepra të tilla, në të cilat historia dhe gazetaria ndërthuren, i japin një kontribut të çmuar kulturës dhe kujtesës sonë kombëtare.
Deklarata e plotë:
“Kjo është diçka e trishtueshme për mua, por presidenti Trump ka axhendën e tij. Është i zgjedhur dhe ka një mandat për të bërë ndryshime dhe reforma, dhe ende nuk e dimë se si do të përfundojë kjo çështje.
Ai nuk e ka mbyllur Zërin e Amerikës, sepse ekziston një ligj i Kongresit – kjo çështje duhet të kalojë aty nëse ai dëshiron ta mbyllë. Aktualisht, ai po përpiqet të bëjë reforma në Zërin e Amerikës. Për mua, kjo është diçka e dhimbshme. E shoh me trishtim këtë zhvillim, sepse kam qenë për tre dekada në Zërin e Amerikës, si spiker dhe njëkohësisht gazetar, ashtu si ju, duke marrë intervista e realizuar kronika.
Presidenti ka mandat nga zgjedhësit – është zgjedhur me 80 milionë vota – dhe një president me një mandat të tillë ka të drejtë të zbatojë programin e tij. Për momentin, po bëhen shkurtime si pjesë e masave të përgjithshme të administratës amerikane për të ulur borxhin e jashtëm, i cili ka arritur në 36 trilionë dollarë. Sipas presidentit Trump, nuk ka rrugë tjetër përveçse të ndërmerren këto shkurtime.
Për mua personalisht, kjo nuk është diçka pozitive.”
