Asociacioni i Gazetarëve të Shqipërisë shpreh zhgënjimin për votimin e së hënës në Parlament, ku u zgjodhën anëtarët dhe kryetari i ri i Këshillit Drejtues të Radio Televizionit Shqiptar.
Në krye të Këshillit u zgjodh me konsensus politik zëdhënësi i Kreut të Grupit Parlamentar të Partisë Socialiste, z. Fatjon Hoxhalli. Ndërkohë, anëtarë të këshillit u zgjodhën edhe: zëdhënësi i zv.kryetarit të Parlamentit Blendi ÇUÇI; këshilltari i jashtëm i Kryetares së Kuvendit Elisa SPIROPALIT; ish-zëvendësministri i Bujqësisë i Partisë Socialiste, i liruar nga detyra në 2024; një anëtar i Këshillit Kombëtar të PD; një ish-deputete e PD.
Shkrirja e Këshillit Drejtues të RTSH pak javë më parë, me propozimin e Komisionit të Medias dhe me votimin e Parlamentit, u duk si një sinjal i qartë se palët politike kishin vendosur t’i jepnin fund paligjshmërive politike.
Por me zgjedhjen e shumicës së anëtarëve politikë, Parlamenti tregoi se interesat e ngushta partiake mbizotëruan mbi interesin publik.
Anëtarët e Komisionit të Medias dhe më pas të Parlamentit i mohuan sot publikut mundësinë që RTSH të jetë një institucion dinjitoz dhe i pandikuar politikisht.
Votimi për Këshillin Drejtues të RTSH:
Enio Civici 77 pro, 7 abstenime, 2 kundër
Pano Xhixho 82 pro, 5 abstenime, 0 kundër
Alket Braho 55 pro, 26 abstenime, 6 kundër
Zamira Kita 77 pro, 8 abstenime, 1 kundër
Lorenc Vangjeli 72 pro, 6 abstenime, 5 kundër
Bujar Kapexhiu 75 pro, 4 abstenime, 5 kundër
Osman Mula 84 pro, 1 abstenim, 3 kundër
Petrit Beci 76 pro, 5 abstenim, 3 kundër
Rajmonda Bulku 78 pro, 3 abstenim, 7 kundër
Robert Budina 66 pro, 9 abstenim, 11 kundër
Elidon Haliti 57 kundër, 10 pro
Fatjon Hoxhalli 74 pro, 6 abstenime, 7 kundër.
