Në rrugët ndërmjet pallateve në lagjen nr.5 të qytetit të Pogradecit, për shkak të mos orjentimit të një sensi kalimi për mjetet e rezidentëve, shpeshherë krijohet kaos dhe bllokim trafiku. Mungesa e vendosjes së tabelave për bërjen me një sens të këtyre rrugëve, bëhet shkak që në shumë orë të ditës qytetarët të bllokohen në rrugët e brendshme të kësaj lagje.
Shpeshherë ata kanë apeluar, por ende Bashkia e Pogradecit nuk ka marrë masa për të vendosur tabela. Situata u rëndua më tepër në këto ditë të fluksit, teksa mungesa e vetëm tre tabelave duket që është shkak i kësaj situate. Banorët i çojnë një apel bashkisë së qytetit të marrë masa duke vepruar për këtë situatë, pasi nga dita në ditë gjendja bëhet më e vështirë dhe në shumë raste edhe situata është bërë shkak për konflikte midis drejtuesve të mjeteve.
