Disa ditë më parë Këshilli i Qarkut Korçë, ka bërë publik disa nga vendimarrjet të cilat pritet të shoqërohen me investimet për vitin e ardhshëm. Por siç dihet pjesa e investimeve në këtë institucion, nga buxheti i tij, kërkohet nga vetë bashkitë e qarkut. Duket se bashkia e Pogradecit, është mjaftuar duke kërkuar vetëm dy elemente nga Këshilli i Qarkut Korçë, e para mirëmbajtjen e monumenteve (shtatoreve) të Lasgushit dhe Mitrushit dhe financimin e Mokra N’fest. Ndërkohë që bashkitë e tjera kanë kërkuar një sërë investimesh tashmë të miratuara në infrastrtukturë dhe ndërtimin e objekteve kulturore.
A e meritojnë Pogradecarët që Bashkia të mjaftohet duke kërkuar vetëm ahengje dhe bojë për shtatoret? Saktësisht ky është vizioni i Bashkisë Pogradec, jashtë largpamësisë dhe lidhet me interesa të ngushta përfitimi dhe jo me investime të qëndrueshme për qytetin. Kë përfaqëson institucioni i Bashkisë Pogradec qytetin apo ahengjet që nuk japin komunitetit asnjë benefit? Nëse ishte kaq vështirë për të siguruar një kovë bojë për monumentet e kolosve, të hapej një thirrje për qytetarët të mblidhnin fonde dhe jo të poshtërohen në këtë mënyrë.
Këshilli i Qarkut Korçë ka miratuar një buxhet ambicioz për vitin 2025, i cili pasqyron një angazhim të palëkundur për zhvillimin e qëndrueshëm dhe gjithëpërfshirës të rajonit. Ky buxhet është konceptuar për të përmirësuar ekonominë lokale, turizmin, infrastrukturën dhe shërbimet sociale, duke përfshirë nevojat dhe potencialet e çdo zone brenda qarkut.
Ja pikat kryesore të Buxhetit të Këshillit të Qarkut Korçë miratuar pas sugjërimeve të bashkive të Qarkut.
Pikat kryesore të Buxhetit për 2025:
Investime të rëndësishme në turizëm:
– Ndërtimi i muzeve me rëndësi të veçantë, si *Muzeu Dritëro Agolli* në Devoll dhe *Muzeu Etnografik dhe Historik* në Korçë, të cilët do të shërbejnë si qendra referimi për ruajtjen dhe promovimin e trashëgimisë kulturore dhe historike të rajonit.
– Rehabilitimi dhe mirëmbajtja e monumenteve të figurave të njohura letrare kombëtare, si Lasgush Poradeci dhe Mitrush Kuteli, për të forcuar atraksionet kulturore të qytetit të Pogradecit.
– Krijimi i një qendre të re informacioni, Infopoint, në Ersekë për të lehtësuar vizitorët në eksplorimin e atraksioneve lokale dhe rajonale.
– Dedikimi i një fondi shtesë prej “50 milionë lekësh” për projekte të reja turistike, me një formulë bashkëpunimi të qëndrueshme: 60% financim nga Këshilli i Qarkut dhe 40% nga bashkitë përfituese.
Zhvillim dhe projektim për të ardhmen:
– Përgatitja e projekteve të rëndësishme si “Muzeu i Sazeve” në Leskovik, për të ruajtur dhe promovuar trashëgiminë muzikore tradicionale të rajonit.
– Projekt Studime për “rrugët pedonale dhe qendrat multifunksionale” në Pustec, duke përmirësuar qasjen dhe atraktivitetin e zonës për turistët dhe banorët.
– Projekt Studimi “Rehabilitimi i Lagjes Historike” në Maliq, një projekt që synon ruajtjen e karakterit historik të kësaj zone dhe integrimin e saj në zhvillimin turistik.
– Projekt studimi i “Muzeut të Palafiteve dhe historisë së tharjes së kënetës” në Maliq, një hapësirë që do të kombinojë aspektet edukative dhe turistike.
Promovimi i rajonit në nivel kombëtar dhe ndërkombëtar:
– Pjesëmarrja e qëndrueshme në panaire ndërkombëtare prestigjioze, si “Philoxenia” në Selanik, etj., për të rritur dukshmërinë dhe atraktivitetin e rajonit në tregjet globale.
– Organizimi i eventeve që promovojnë talentin dhe potencialin lokal, si aktiviteti “Sportistët më të Mirë të Qarkut” dhe promovimi i produkteve autentike bujqësore të rajonit.
Ruajtja dhe zhvillimi i trashëgimisë kulturore:
– Festivali “Autonom Fest,” një ngjarje që përkujton shpalljen e Krahinës Autonome të Korçës dhe promovon trashëgiminë kulturore të rajonit përmes këngëve, valleve dhe kostumeve tradicionale.
– Ekspozitat që nxjerrin në pah trashëgiminë historike, si “Ekspozita e Koleksionistëve” dhe restaurimi i monumenteve historike, si ai i Themistokli Gërmenjit.
Mbështetje për të rinjtë dhe edukimin:
– Trajnime profesionale për krijimin e 20 guidave turistike, duke ofruar mundësi punësimi dhe aftësi të reja për të rinjtë e rajonit.
– Projekte edukative dhe artistike për të inkurajuar të rinjtë, si “ArtKid,” “Rin-Art,” dhe konkurset edukative si “Gjuha Ime.”
– Organizimi i Olimpiadave për shkollat e mesme, për të nxitur kreativitetin, konkurrencën dhe zhvillimin intelektual të nxënësve.
Projekte sociale për një komunitet gjithëpërfshirës:
– Mbështetje për qendrat ditore si “Epoka e Artë,” të dedikuara për të moshuarit, dhe qendrat për fëmijët me kushte të vështira, duke siguruar edukim dhe shërbime cilësore për grupet më të prekura të komunitetit.
– Fushata ndërgjegjësuese, si “Tetori Rozë,” për të promovuar shëndetin dhe mirëqenien e grave.
Festat dhe aktivitetet lokale:
– Mbështetje për eventet tradicionale, si “Mokra në Festë,” “Festa e Dobërgores,”, “Kolonia e Piktorëve të Vegjël,” “Festa e Ëmbëlsirave” të cilat nxisin ruajtjen e kulturës dhe tërheqin vizitorë në zonë.
Përmirësimi i shërbimeve dhe infrastrukturës të institucionit
Një hap i sigurt drejt një të ardhmeje më të mirë:
Ky buxhet reflekton vizionin dhe përkushtimin për të konsoliduar arritjet e deritanishme dhe për t’i zgjeruar me projekte të reja që do të përmirësojnë jetën e çdo banori të Qarkut Korçë. Me bashkëpunimin dhe mbështetjen e të gjitha palëve të përfshira, këto projekte do të bëhen realitet dhe do të sjellin zhvillim të qëndrueshëm për rajonin tonë.
