Fshatrat e Devollit të Sipërm, ku peizazhi mahnitës alpin, ndërthuret me histori shekullore dhe tradita të vyera, po orientohen drejt turizmit. Banorët e hershëm të Qytezës, Arrëzës, Sinicës dhe Nikolicës, të larguar jashtë vendit kryesisht, po kthehen për të restauruar shtëpitë.
Në qytezë, ku sot dimërojnë vetëm 3 familje, shumica e shtëpive, dikur gërmadha, janë rindërtuar nga emigrantët. Interesi në rritje, sidomos i turistëve të huaj për të eksploruar natyrën e kësaj zone, ka nxitur edhe ndërtimin e bujtinave të para.
Ndërtimi i segmentit rrugor që lidh Mirasin me Arrëzën dhe më tej Sinicën me Dardhën, ka lehtësuar lëvizjen e turistëve në këto zona, të cilat, edhe për shkak të infrastrukturës, kanë mbetur me vite të pashfrytëzuara.
Zhvillimi i agroturizmit dhe turizmit të natyrës në zonën e Devollit të Sipërm, e cila mund të shfrytëzohet edhe për sporte dimërore, pritet të pasurojnë ofertën turistike për vizitorët që zgjedhin juglindjen.
Klan News
