Rritja e pagave, e shumëreklamuar në administratën publike, duket se nuk ka pasur efektin e pritur. Përveç dyfishimit të pagave të titullarëve të Bashkisë Pogradec, të gjitha pozicionet e tjera kanë përfituar vetëm një rritje minimale. Një specialiste në këtë bashki, që preferon të mbetet anonime, deklaroi se rritja e pagës së saj ishte më pak se 4000 lekë – një rritje që ajo e konsideron një tallje të hapur.
Specialistja shprehet se, pavarësisht nivelit të saj të lartë të arsimit dhe kualifikimeve, paga e përgjegjësit të sektorit, që ka më pak kualifikime, është rritur ndjeshëm më shumë. Sipas saj, kjo e përul pozicionin e specialistëve, ndërsa thekson se punën më të ngarkuar e bën administrata dhe jo titullarët.
Në këto kushte, bie në sy dyfishimi i pagës së kryetarit të bashkisë, pa përfshirë përfitimet e tjera që vijnë nga funksioni i tij. Duket se propaganda ka arritur një kulm të ri, duke përdorur në emër të saj edhe ata pak punonjës të ndershëm që shërbejnë në institucionet publike.
