Banorët e fshatit Stropckë në Njësinë Administrative Dardhas kanë nisur të mbledhin firmat këtë të premte për të kundërshtuar mbylljen e shkollës 9-vjeçare “Demokracia” dhe transferimin e nxënësve në shkollën e fshatit Lushnicë në Njësinë Administrative Çërravë.
Kjo situatë është shkaktuar nga ulja e numrit të nxënësve dhe klasave kolektive në shkollën “Demokracia”. Ndër të tjera, fëmijët e prindërve që ndjekin mësim në këtë shkollë thonë se kushtet në shkollën “Demokracia” janë shumë të mira dhe nuk ka mungesa në staf. Gjithashtu, rreth 70 nxënës vazhdojnë mësimin në klasa kolektive.
Një prind tha:
“Shkollën e kemi 5 minuta larg nga shtëpia, duan të na i dërgojnë 30 minuta larg, nuk kemi mundësi t’i çojmë fëmijët aty. Sidomos dhe në dimër kur kushtet vështirësohen.”
Një tjetër banor paralajmëroi protestë:
“Nëse guxojnë të na largojnë shkollën nga fshati, do protestojmë.”
Nga zyra vendore e arsimit parauniversitar në Pogradec, bëhet e ditur se nuk është në planet e afërta mbyllja e shkollës “Demokracia” në fshatin Stropckë.
Sipas tyre, do të vlerësohet numri i nxënësve në të ardhmen për të marrë vendime që përputhen me projektet e arsimit parauniversitar, duke përfshirë reduktimin e klasave kolektive, por gjithmonë me miratimin e prindërve.
