Ditën e sotme u shemb një pjesë e segmentit rrugor Korçë – Ersekë. Kjo rrugë është në ndërtim që prej vitit 2013, duke shkurtuar kohën për të mbërritur në zonën e Kolonjës. Sipas informacioneve të bëra të ditura, rruga ende nuk është marrë në dorë nga autoriteti kontraktues, ka pasur vonesa të shumta në punën e strukturës së saj në ditët e fundit, gjithashtu punimet kanë qenë pothuajse të ndalura. Megjithatë, rruga, edhe pse është në ndërtim, ka qenë e hapur për qarkullimin e automjeteve, dhe fatmirësisht gjatë shembjes së sotme nuk ka pasur lëndime apo dëme të makinave.
Investimi në rrugën 35 km ka kushtuar shumë buxhetit të shtetit, dhe në vitin 2022 u kërkua një fond shtesë për këtë rrugë, i cili arriti në shifrën e 2,164,693,349.44 lekë pa TVSH. Tenderin për këtë projekt e fitoi firma “A. N. K.” me administrator Agim Kola. Rruga, sipas parametrave inxhinierik, është një rrugë interurbane që shërben për të evituar kalimin në Qafën e Qarrit për udhëtarët që shkojnë drejt Kolonjës.
