Programet e ndryshme edukative, përmbledhin shumë aktivitete të ndryshme, si: vizita muzeale me përshtatjen e guidës sipas moshës së vizitorit, punëtori, orë mësimore, trajnime, leksione, seminare etj, ku në fokus janë gjithmonë fëmijët, nxënësit apo dhe studentët.
Përgjatë vitit 2023 patëm 59 aktivitete të ndryshme, me nxënës nga të gjitha moshat, 60% e tyre vinin nga rajoni i Korçës dhe pjesa tjetër nga e gjithë Shqipëria.
Shumë interes dhe vizitueshmëri kemi pasur gjithashtu edhe nga vendet fqinjë si Maqedonia e Veriut dhe Greqia. Muzeumet, ashtu si libraritë, së pari janë institucione për edukimin social.
Duke pasur këtë pikënisje, muzeu ynë punon dhe zhvillon programe edukative, për të gjitha brezat, duke nisur nga më të vegjëlit. Qëllimi është jo vetëm njohja e trashëgimisë kulturore të vendit, por nxitja, respekti, kultivimi, frymëzimi, krijimi, por dhe përshtatja e hapësirave të mendimit për të ardhmen.
