1.086 ditë jashtë Shqipërisë, rasti i Arben Ahmetajt rikthen debatin mbi pasurinë dhe përgjegjësinë e politikanëve
Kanë kaluar 1.086 ditë që kur ish-zëvendëskryeministri dhe ish-ministri Arben Ahmetaj u largua nga Shqipëria, ndërsa ndaj tij vijojnë procedurat ligjore dhe ai mbetet jashtë territorit shqiptar.
Rasti i Ahmetajt ka rikthyer edhe një herë në vëmendje debatin publik mbi pasurinë e krijuar nga një pjesë e politikanëve shqiptarë gjatë ushtrimit të funksioneve shtetërore. Për shumë qytetarë, fakti që një ish-zyrtar i lartë mund të qëndrojë për vite me radhë jashtë vendit pa ushtruar një aktivitet të njohur pune, ngre pikëpyetje mbi burimet financiare që i mundësojnë një jetë të tillë.
Në të njëjtën kohë, realiteti i shumicës së shqiptarëve paraqitet krejt ndryshe. Mijëra familje nuk arrijnë të përballojnë as edhe një ditë pushime gjatë sezonit veror. Të tjerë konsiderohen me fat nëse mund të kalojnë tre ditë larg përditshmërisë, ndërsa vetëm një pjesë e vogël kanë mundësi ekonomike për të bërë një javë ose dhjetë ditë pushime. Shkaku kryesor mbeten kostot e larta të jetesës dhe të turizmit.
Kontrasti mes standardit të jetesës së qytetarëve dhe mundësive financiare që perceptohet se kanë pasur disa zyrtarë të lartë vijon të ushqejë debat publik dhe të ngrejë kërkesa për hetime më të thelluara, transparencë dhe përgjegjësi institucionale.
Në një reagim publik, gazetari Armand Braho e lidh këtë kontrast me rastin e ish-ministrit Arben Ahmetaj, duke shkruar:
“Për të kuptuar sa para ka bërë një politikan shqiptar në pushtet, mjafton të shihni ish-ministrin Arben Ahmetaj, i cili prej 1.086 ditësh ndodhet jashtë vendit, pa punuar dhe duke vijuar të shpenzojë paratë që i mori gjatë kohës kur ishte në qeverinë Rama.
Sot ka mijëra shqiptarë që nuk mund të bëjnë as edhe një ditë pushime. Më me fat janë ata që arrijnë të bëjnë vetëm 3 ditë, e shumë më pak ata që mund të përballojnë 10 ditë pushime. Pikërisht për shkak të kostove.
Politikanët shqiptarë nuk vjedhin shumë, pak fare! Aq sa nuk u mbarojnë dot lekët…”
