Peshkatarët e Pogradecit kanë kundërshtuar sot urdhrin e Ministrisë që ndalon peshkimin me rrjetë në liqenin e Pogradecit. Ky vendim ka ardhur pasi kjo periudhë e vitit është koha kur specia e klenit shumohet. Ndërsa autoritetet, për të mbrojtur klenin që është në periudhë shumimi, duket se kanë penalizuar edhe peshkatarët që peshkojnë specie të tjera si korani.
Ditën e sotme, peshkatarët kanë kërkuar që të lejohet peshkimi me rrjetë deri në largësi mbi 1500 metra nga bregu – gjë e cila nuk cenon speciet që janë në shumim.
Peshkatarët gjithashtu kanë zhvilluar një takim me kreun e Bashkisë Pogradec, ku u planifikua që do të zhvillohet një peticion drejtuar Ministrisë së Bujqësisë për të riparë këtë problematikë dhe për të lejuar që peshkatarët, gjatë këtij sezoni, ashtu si edhe vitet e tjera, të vazhdojnë të peshkojnë koranin, i cili në këtë periudhë të vitit nuk është i ndaluar.
Në rrethin e Pogradecit janë 120 peshkatarë, të cilët preken nga kjo vendimmarrje, ku puna kryesore dhe metoda e vetme për të mbajtur familjen kanë vetëm peshkimin.
