Pas 5 ditësh izolim, fillojnë punimet për hapjen e rrugës Lozhan–Mesmal…

Në Bashkinë Maliq kanë nisur këtë të mërkurë punimet për zhbllokimin e rrugës Lozhan–Mesmal, e cila prej pesë ditësh ka qenë e pakalueshme si rezultat i rrëzimit të gurëve dhe dherave.
Ekipet e Emergjencave Civile po punojnë për të rikthyer qarkullimin normal dhe për të garantuar lidhjen e zonave të thella me rrugën kryesore.
Institucionet kanë mbajtur kontakte të vazhdueshme me banorët e zonës së izoluar, për t’u ardhur në ndihmë në rast emergjencash, kryesisht atyre shëndetësore.
Ndërkohë, nga verifikimet në terren raportohet se pastrimi i rrëshqitjeve përgjatë segmentit Lozhan–Mesmal po vijon me ritme të shpejta.
Rihapja e këtij aksi rrugor është jetike për katër fshatrat Velçan, Selcë, Mesmal dhe Niçë, të cilat presin rivendosjen e lëvizjes së lirë brenda ditëve në vijim.