Për shkak të reshjeve të shumta që kanë përfshirë gjithë rajonin, përfshirë edhe zonën e juglindjes, tregu industrial në Pogradec gjendet sërish përballë faktit se i gjithë shiu apo dëbora që bie jashtë, përfundon brenda në treg, duke dëmtuar kështu të gjitha produktet dhe materialet që ndodhen aty.
Tregtarët, të cilët sot që në orën 7 të mëngjesit kanë hapur tregun, janë parë me kova dhe lecka në duar për të minimizuar ujin e rrjedhur, por me reshjet e shumta duket se nuk ia kanë dalë, pasi materialet e tyre janë lagur dhe i gjithë tregu është përfshirë nga uji.
Prej shumë vitesh këta tregtarë punojnë në këtë treg. Sipas tyre, Bashkia ka premtuar prej kohësh ngritjen e një tregu të ri, por asnjëherë nuk është marrë iniciativa për ndërtimin e tij, dhe ata çdo vit përballen me të njëjtën situatë.
Ata sot i drejtojnë apelin pushtetit vendor që, fillimisht, të marrë masa për situatën aktuale dhe më pas të krijojë kushtet e nevojshme për një treg të ri.
