Pika e kalimit kufitar e Qafë Thanës, ditëve të fundit, po përballet me një fluks të lartë hyrjesh dhe daljesh nga Shqipëria në drejtim të Maqedonisë së Veriut dhe anasjelltas. Shumica e kalimtarëve janë shtetas të huaj që kalojnë tranzit nëpër Maqedoninë e Veriut për të arritur në bregdetin shqiptar, si dhe shqiptarë nga Maqedonia e Veriut, të cilët më së shumti zgjedhin Durrësin dhe Vlorën për të kaluar pushimet.
Pritjet në pikun e fluksit arrijnë deri në 40 minuta, ndërsa autoritetet shqiptare po punojnë me kapacitet të plotë të sporteleve dhe me procedurë të përshpejtuar për të shmangur radhët e gjata. Dogana e Qafë Thanës mbetet pika e kalimit kufitar me numrin më të lartë të kalimeve ndër doganat e juglindjes, ku vetëm gjatë tre ditëve të fundit kanë kaluar mbi 30 mijë udhëtarë. Fluksi pritet të mbetet i lartë deri në fund të muajit gusht.
