- Advertisement -
Një ngjarje tragjike është shënuar në orët e para të mëngjesit të sotëm në qytetin e Pogradecit. Rreth orës 06:00, në lagjen nr. 1, ka rënë zjarr në banesën e shtetases Kozeta Teço, 52 vjeçe.
Si pasojë e asfiksisë nga tymi, 52-vjeçarja ka humbur jetën. Ajo jetonte e vetme, nuk kishte fëmijë dhe nuk kishte qenë e martuar. Mësohet se viktima ishte në kushte të vështira ekonomike dhe ndihmohej nga motra e saj.
Shërbimi zjarrfikës dhe grupi hetimor ndodhen në vendngjarje, ku kanë bërë të mundur shuarjen e flakëve dhe po punojnë për të zbardhur plotësisht shkaqet e zjarrit. Dyshohet paraprakisht se zjarri është përhapur në dy ambiente të hyrjes së banesës dhe se shkaku i vdekjes ka qenë asfiksia nga tymi.
