ATSH/ Përdorimi i teknologjive dhe praktikave inovative është hapi i duhur për fermerët, në përmirësimin e prodhimit vendas.
Ministrja e Bujqësisë dhe Zhvillimit Rural, Anila Denaj ndau në rrjete sociale momente nga dita fushore në Qendrën Transferimit të Teknologjive Bujqësore, në Korçë.
Në fokus ishte demonstrimi vjetor për kultivatet eksperimentale të elbit, grurit, patates dhe fasules, duke krijuar një hapësirë bashkëpunimi dhe shkëmbimi praktik për fermerët e zonës.
Sipas saj, rezultatet e arritura do të ndihmojnë fermerët në zgjedhjen e kultivarëve më të mirë për prodhim të lartë dhe qëndrueshmëri.
“Synojmë identifikimin e kultivarëve më të përshtatshëm për klimën dhe terrenin lokal. Dita fushore shërben si një hap konkret drejt rritjes së produktivitetit, uljes së kostove dhe përmirësimit të cilësisë së prodhimeve bujqësore, në mënyrë që fermerët të përfitojnë zgjidhje të reja për kultivim të qëndrueshëm dhe të orientuar drejt tregut”, tha Denaj.
