Pas disa ditësh kërkimesh, është gjetur i pajetë shtetasi Jashar Spaho, 70 vjeç, nga Devolli, i cili ishte raportuar i humbur që më datë 28 qershor nga familjarët e tij. Trupi i tij u gjet këtë të martë në lumin Devoll, në segmentin midis fshatit Tren dhe Bitinckë.
Familjarët kishin ngritur shqetësimin edhe në media, duke bërë thirrje për ndihmë në gjetjen e të moshuarit. Fatkeqësisht, kërkimet përfunduan tragjikisht.
Sipas burimeve zyrtare, hetimet paraprake janë fokusuar në dy pista kryesore: atë të vetëvrasjes si dhe të rrëzimit aksidental në lumë, që ka sjellë më pas mbytjen dhe humbjen e jetës. Policia e Devollit po vijon hetimet për të zbardhur rrethanat e ngjarjes, ndërkohë që trupi është dërguar në morg për kryerjen e ekspertizës mjeko-ligjore.
Ngjarja ka tronditur komunitetin lokal dhe ka rikthyer në vëmendje nevojën për reagim të shpejtë dhe bashkëpunim në rastet e humbjeve të personave të moshës së tretë.
