Zaroshka e Pustecit u bë këtë vit mikpritësja e “Kayak Fest”, një aktivitet që bashkon sportin, aventurën dhe trashëgiminë kulturore në një nga zonat më piktoreske të juglindjes shqiptare. Me një itinerar që shtrihet nga 2.5 deri në 5 kilometra, pjesëmarrësit përshkuan ujërat e qeta të liqenit të Prespës me kajak, nga plazhi i Zaroshkës deri në ishullin e Maligradit.
Në dispozicion ishin 12 kajakë, ndërsa dhjetëra të apasionuar pas natyrës dhe sportit përjetuan një eksperiencë të veçantë në një nga destinacionet më pak të eksploruara të vendit. Sipas Elton Dheftos, një nga organizatorët, Zaroshka është zgjedhur për potencialin unik që ofron: një ndërthurje ideale mes liqenit, malit dhe historisë.
Aktiviteti është vlerësuar edhe nga autoritetet lokale si një shtesë me vlerë në ofertën turistike të rajonit. Kryetari i Bashkisë së Pustecit, Pali Kolefski, theksoi se ngjarje të tilla po ndihmojnë në formësimin e Prespës si një destinacion të qëndrueshëm dhe tërheqës për turizmin natyror.Pjesëmarrësit e “Kayak Fest” e përshkruan këtë përvojë jo vetëm si një sfidë fizike, por edhe si një lidhje të thellë me natyrën dhe komunitetin vendas. Aktiviteti po shndërrohet gradualisht në një traditë që promovon turizmin e qëndrueshëm dhe zhvillimin e zonave të nënvlerësuara të Shqipërisë.Prespa, me liqenin e saj të kthjellët dhe trashëgiminë historike, po fiton gjithnjë e më shumë vëmendje si një destinacion i gjithanshëm për ata që kërkojnë më shumë sesa pushime – një përjetim të plotë natyror dhe kulturor.
