“Opozita korçare me pushime verore… vjeçare”
Nga: Eduart Bardhushi
Korça i ka të gjitha: Kulturën, natyrën, gatimin, madje edhe një bulevard kryesor që po boshatiset si zyrat e opozitës pas zgjedhjeve të 11 majit.
Ajo që s’ka më qyteti ynë, është opozita. Jo që nuk ekziston, por është në një fazë të thellë detoksifikimi politik, diku mes plazhit të Pogradecit.
Tashmë me sa duket ka marrë, jo vetëm pushime verore, por vjeçare, ose siç thonë më të diturit: Një “pauzë reflektimi”, një pauzë që po zgjat më shumë se mandati i një kryebashkiaku.
Dikur shfaqeshin me flamuj, brohorima dhe statuse të zemëruara në Facebook. Tani hiç…qetësi absolute!
Ironia është se në vend të sfidojnë pushtetin, ata po sfidojnë vetë ekzistencën e tyre.
Asnjë reagim për rritjen e çmimeve të shportës, karburantit, për shpopullimin, për shuarjen ditë pas dite të bulevardit “Republika”…hiç!
Tashmë kur dikush përmend “rilindjen”, nuk e di më nëse i referohet Partisë Socialiste apo shpresës për një ringjallje opozitare, sepse realisht, opozita në Korçë nuk është më në opozitë. Është një pushim të zgjatur që s’i dihet data e kthimit…
Pooor mos u shqetësoni, ka akoma “shpresë”. Diku, në një kafe të qytetit, tre pensionistë po flasin ende për politikë dhe mendojnë që një ditë opozitarët do t’i marrin gjërat seriozisht. Deri atëherë pushime të mbara, se për punë… ka kohë.
