ATSH/ Kryetari i Bashkisë së Korçës, Sotiraq Filo, me rastin e hapjes zyrtare të sezonit turistik, priti ministrin e Politikës Sociale, Demografisë dhe Rinisë të Maqedonisë së Veriut, Fatmir Limanin.
Gjatë takimit Filo dhe Limani diskutuan mundësitë për forcimin e bashkëpunimit në fushat sociale dhe shërbimet për komunitetin, ku ministri vlerësoi edhe transformimin dhe zhvillimin e qëndrueshëm të Korçës. U theksua gjithashtu se bashkëpunimi rajonal është rruga e vetme drejt zhvillimit të qëndrueshëm ekonomik dhe kulturor, duke vlerësuar marrëdhëniet historikisht të mira ndërmjet dy vendeve dhe potencialin e madh të rajonit për projekte të përbashkëta.
Sipas ministrit maqedonas, Korça, Ohri, Struga dhe rajonet përreth ofrojnë një mundësi reale për krijimin e një korridori të integruar turistik ndërballkanik, që mund të shërbejë si model i bashkëpunimit mes vendeve fqinje dhe të nxisë zhvillimin lokal në të dy anët e kufirit.
Ministri Fatmir Limani beri të ditur se po shqyrtohet mundësia e hapjes së një konsullate të Maqedonisë së Veriut në Korçë, si një hap konkret për intensifikimin e bashkëpunimit dypalësh. Limani është një nga ministrat shqiptarë në qeverinë maqedonase, i angazhuar për bashkëpunim institucional dhe projekte të përbashkëta.
