Në një atmosferë plot emocion dhe nostalgji, aktori i njohur korçar Guri Koço ka festuar një përvjetor të veçantë të karrierës së tij artistike. Prej gati pesë dekadash, Koço mbetet një ndër figurat më të dashura të skenës shqiptare, i admiruar jo vetëm në Korçë, por në të gjithë vendin.
Në Teatrin “Andon Zako Çajupi”, u shfaq për herë të parë “50 pa një”, një përmbledhje skenike me poezi, humor dhe kujtime, përmes së cilës aktori ndau me publikun jetën e tij artistike. Në këtë mbrëmje të veçantë, përkrah tij ishin kolegë, miq të afërt, familjarë dhe artdashës që kanë ndjekur prej vitesh rrugëtimin e tij.
Në këtë përvjetor, nuk munguan emocionet as në radhët e kolegëve. Aktorja Zamira Kita solli kujtime nga bashkëpunimi me Koçon, duke vlerësuar profesionalizmin dhe ndjeshmërinë që e karakterizon. Ndërsa aktori Astrit Çerma e cilësoi atë si një përfaqësues të denjë të brezit të artë të teatrit shqiptar.
Vetë Guri Koço rrëfeu se kishte kohë që mendonte këtë ngjarje dhe prej tre muajsh përgatitej me përkushtim, duke i dhënë skenës një shfaqje të ndërtuar me dashuri dhe spontanitet. Ai u shpreh se arti ka qenë pjesë e pandarë e jetës së tij dhe se përmes kësaj performance dëshironte të falënderonte publikun që e ka ndjekur e mbështetur ndër vite.
“50 pa një” nuk ishte thjesht një retrospektivë e një karriere të gjatë, por një dëshmi e gjallë e lidhjes së fortë midis një aktori dhe publikut të tij. Përmes interpretimit të sinqertë dhe ngjyrave të humorit e poezisë, Guri Koço dëshmoi edhe një herë se arti i vërtetë buron nga përkushtimi dhe dashuria.
