Një ngjarje e rëndë, fatmirësisht pa pasoja fatale, është regjistruar në fshatin Kamenicë të njësisë administrative Libonik në Maliq. Një fëmijë 2-vjeç ka rënë aksidentalisht nga ballkoni i katit të dytë të banesës dhe ka pësuar dëmtime fizike.
“Më datë 21.05.2025, një shtetas i mitur 2 vjeç, ka rënë aksidentalisht nga ballkoni i katit të dytë të banesës në fshatin Kamenicë dhe për pasojë është dëmtuar. Aktualisht po merr mjekim në spital, jashtë rrezikut për jetën.”
Menjëherë pas ngjarjes, familjarët kanë njoftuar shërbimet e urgjencës, të cilat e kanë transportuar të miturin në spitalin rajonal të Korçës, ku ai po trajtohet nën kujdesin e mjekëve.
Policia ka nisur një hetim paraprak për të dokumentuar rrethanat e ngjarjes dhe për të vlerësuar përgjegjësinë eventuale në lidhje me kushtet e sigurisë së banesës. Gjendja shëndetësore e fëmijës raportohet e stabilizuar.
