ATSH/ Njësia e Mbrojtjes së Fëmijëve në bashkëpunim me Drejtorinë e Përgjithshme të Krimit Kibernetik dhe Agjencinë Shtetërore të të Drejtave dhe Mbrojtjes së Fëmijëve, realizuan në qytetin e Korçës një aktivitet ndërgjegjësues, në kuadër të mbrojtjes së fëmijëve nga materialet e dëmshme në internet.
Kryebashkiaku i Korçës, Sotiraq Filo, në një postim në rrjetet sociale, u shpreh se, mbrojtja e fëmijëve në botën digjitale është një prioritet i rëndësishëm.
“Aktivitete të tilla kontribuojnë në ndërtimin e një shoqërie më të sigurt dhe më të ndërgjegjshme për rreziqet e mundshme që mund të paraqiten në këtë hapësirë”, tha kryetari i Bashkisë Korçë.
Pak kohë më parë qeveria vendosi mbylljen e platformës TikTok në Shqipëri, pas një konsultimi me prindër e mësues, të cilët u shprehën në favor të mbylljes, si një masë për shtimin e sigurisë për fëmijët, të cilët së fundmi janë të ekspozuar ndaj materialeve të dëmshme që ofrohen në rrjet.
