Teksa vetëm pak orë na ndajnë nga primaret e Partisë Demokratike Pogradec, kandidati Arbër Male dhe njëri prej zërave kryesor opozitar në Pogradec, i ka bërë thirrje anëtarsisë të mbështesin kandidaturën e tij si një mënyrë për bashkim dhe për të forcuar Partinë Demokratike. Male është këshilltar i Këshillit Bashkiak dhe njëkohësisht zëri kryesor opozitar në qytetin e Pogradecit, i cili në mënyrë të hapur ka denoncuar parregullësi dhe abuzime, të cilat në shumë raste kanë detyruar institucionet vendore të reflektojnë.
Arbër Male shkruan:
Në Primare për Pogradecin!
Në datën 1 Mars demokratët e Pogradecit i drejtohen kutive të votimit për të votëbesuar kandidatët për Kuvendin e Shqipërisë.
Vendosa të marr pjesë në këtë proces duke pasur bindjen dhe besimin se pjesëmarrja në këtë garë e pasuron dhe përmireson procesin.
Njëkohësisht besoj se ka ardhur koha që demokratët dhe njerëzit e ndershëm të marrin në dorë fatet e këtij qyteti te braktisur nga qeverisja qendrore dhe lokale.
Vetëm përbashkimi i fuqive tona mund të prodhojë ndryshim të jetës, ekonomisë dhe infrastrukturës së qytetit, fshatit, jetës dhe dinjitetit tonë, ndaj pasnesër kam nevojë për votëbesimin tuaj si shenjë dhe mundësi për të nisur një rrugëtim transformues.
Duke i’u falenderuar për besimin e treguar deri më tani dhe duke i’u qenë mirënjohës atyre të cilët më propozuan, kërkoj nga ju që të zgjidhni numrin 11. Arbër Myzafer Male.✅
