Pas ndërprerjes së qarkullimit të kamionëve dhe autobusëve për kalim në doganën e Kapshticës nga pala greke, duket se numri i mjeteve që presin pranë kësaj dogane për të kaluar drejt Greqisë është tepër i lartë.
Kalimtarët dhe drejtuesit e automjeteve shprehen të shqetësuar për këtë situatë dhe thonë se kanë pritur mbi 2 orë për të kaluar doganën, ndërsa ende nuk kanë marrë asnjë përgjigje apo interesim nga pala shqiptare lidhur me kohën kur kufiri do të hapet.
Ata shprehen se ishin të painformuar paraprakisht për këtë mbyllje dhe se situata i gjeti të papërgatitur.
Dogana greke njoftoi mbylljen e kufirit që nga dita e djeshme, në orën 17:00, për autobusët dhe kamionët.