Moti i keq me temperatura të ulëta ka përfshirë edhe qarkun e Korçës prej mbrëmjes së së premtes.
Në zonat e ulëta ka pasur reshje shiu të shoqëruara edhe me erë të fortë, ndërsa në zonat e larta malore ka pasur reshje shiu dhe dëbore.
Ky mot ka sjellë edhe problematikat e para në qark, që kanë të bëjnë kryesisht me energjinë elektrike.
Si pasojë e erërave të forta, ka shkëputje të energjisë elektrike në disa fshatra të bashkive Korçë, Pogradec, Maliq, Kolonjë dhe Devoll.
(Dispeceria Rajonale Korçë)
• Fideri Podgozhan Nst/Guri i Kuq: pa energji 100 abonentë ruralë, zona Bishnicë, Jollë, Selcë e Sipërme.
• Fideri 17 Nst Korçë: pa energji 58 abonentë, zona Goskove.
• Fideri Vithkuq Nst Rehovë: pa energji 150 abonentë ruralë, zona Lekas.
• Fideri 6 Nst Mollas: pa energji 5 abonentë ruralë, zona Grabockë.
• Fideri 4 Nst Lozhan: pa energji 4 abonentë, zona Maliq-Opar, Nikollarë.
Grupet e punës po punojnë për rikthimin e energjisë elektrike në të gjithë territorin.
Ndërkohë, gjatë natës si pasojë e erërave të forta është dëmtuar një pemë në parkun e Drilonit.
Fatmirësisht, nuk ka shkaktuar problematika të tjera, ndërkohë që prej mëngjesit të sotëm është hequr nga grupet e punës.
Ndërkohë, strukturat në nivel qarku dhe çdo bashki janë në gatishmëri për çdo shërbim të nevojshëm dhe situatë të krijuar nga moti në vazhdim.
