Rriten rastet e dhunës ndaj fëmijëve në Korçë: Situatë shqetësuese për shëndetin dhe zhvillimin e tyre
Drejtoria e Kujdesit Social, së bashku me Njësinë e Mbrojtjes së Fëmijëve dhe Familjes në Bashkinë e Korçës, ka trajtuar 45 raste të abuzimit të fëmijëve që prej fillimit të këtij viti. Rastet përfshijnë të gjitha format e dhunës dhe shënojnë një rritje të ndjeshme krahasuar me vitet e kaluara, duke krijuar një situatë alarmante për shëndetin dhe mirëqenien e fëmijëve.
Sipas specialistëve, rastet e abuzimit seksual janë gjithashtu të pranishme, por shpesh mbeten të padeklaruara për shkak të stigmatizimit dhe mungesës së ndërgjegjësimit.
Vasilika Nole, specialiste pranë Njësisë së Mbrojtjes së të Drejtave të Fëmijëve në Korçë, theksoi rëndësinë e ndërgjegjësimit si një shtyllë kyçe për parandalimin e abuzimit. “Politikat edukative dhe mbështetëse duhet të forcohen për të garantuar një mjedis të sigurt për fëmijët, si nga institucionet, ashtu edhe nga familjet,” shtoi ajo.
Nga ana tjetër, Blerta Bilbili, mësuese në qytetin e Korçës, nënvizoi nevojën për një përfshirje më të madhe të shkollave dhe familjeve në procesin edukativ, duke u fokusuar në mbrojtjen dhe zhvillimin emocional të fëmijëve.
Ngjarja e rëndë e humbjes së jetës së një 14-vjeçari në Tiranë është cilësuar si një këmbanë alarmi për institucionet arsimore dhe shoqërinë në tërësi, duke nxitur reflektime të thella mbi sigurinë e fëmijëve në çdo mjedis ku ata rriten dhe edukohen.
Deklaratat u bënë gjatë aktivitetit të Ditës Ndërkombëtare të të Drejtave të Fëmijëve, i organizuar në qytetin e Korçës. Fëmijët zhvilluan një marshim sensibilizues, duke përcjellë mesazhe për respektimin e të drejtave të tyre dhe për nevojën e një shoqërie më të sigurt dhe më të ndërgjegjshme.
