Fshati Orman është një nga fshatrat e qarkut të Korçës që kultivon kryesisht qepën dhe pataten. Por, sipas fermerëve, edhe këtë vit produkti i tyre po mbetet stok ose po kërkohet të shitet me çmime shumë të ulëta. Tregtarët dhe grumbulluesit aktualisht e kërkojnë me 20-25 lekë për kilogram, një çmim shumë më i ulët se kostoja e prodhimit, ku minimalisht çmimi i pranueshëm duhet të ishte jo më pak se 40 lekë.
Fermerët shprehen se këtë vit nuk kanë arritur të mbulojnë as shpenzimet. Ndërkohë, qepa e magazinuar rrezikon të kalbet nëse nuk shitet brenda pak kohësh.
Një tjetër problem për fermerët është mungesa e subvencioneve nga shteti. Ata paralajmërojnë se nëse situata nuk përmirësohet, do të heqin dorë nga bujqësia dhe do të kërkojnë të largohen drejt shteteve europiane.
Vetëm në fushën e Maliqit, sipas të dhënave nga Drejtoria e Bujqësisë në Bashkinë e Maliqit, bëhet e ditur se janë kultivuar 800 hektarë qepë të varieteteve të ndryshme. Ndërkohë, burime të tjera raportojnë se rreth 80% e prodhimit është magazinuar dhe është ende stok nga vetë fermerët.
E njëjta situatë për fermerët e Ormanit paraqitet edhe për kulturën e patates.
